Një zhvillim i ri në arenën ndërkombëtare mund të ndryshojë planet për organizimin e Samitit të NATO-s në Shqipëri gjatë vitit 2027.
Media e njohur spanjolle “El Mundo” raporton se brenda Aleancës janë shtuar ndjeshëm dyshimet nëse samiti i ardhshëm i liderëve do të zhvillohet sipas planit në Tiranë.
Sipas burimeve diplomatike të cituara nga gazeta, mundësitë për zhvillimin e takimit gjatë vitit të ardhshëm konsiderohen tashmë “shumë, shumë të vogla”, ndërsa nuk përjashtohet mundësia që të mos organizohet fare një samit i rregullt në 2027.
Një nga arsyet kryesore që përmendet lidhet me përpjekjet brenda Aleancës për të shmangur përplasje të reja mes presidentit amerikan Donald Trump dhe disa prej aleatëve të NATO-s.
Në raportim ngrihen gjithashtu pikëpyetje mbi nivelin real të shpenzimeve të Shqipërisë për mbrojtjen dhe përmbushjen e objektivave financiare të Aleancës.
Ky zhvillim merr rëndësi të veçantë pasi vetëm pak muaj më parë Sekretari i Përgjithshëm i NATO-s, Mark Rutte, kishte deklaruar se takimi i ardhshëm i liderëve të Aleancës do të zhvillohej në Shqipëri, megjithëse data përfundimtare mbetej për t’u përcaktuar.
Edhe qeveria shqiptare ka deklaruar më herët se kishte nisur përgatitjet për pritjen e një prej ngjarjeve më të rëndësishme ndërkombëtare që do të organizoheshin ndonjëherë në vend.
Megjithatë, raportimi i fundit tregon se situata mund të ketë ndryshuar dhe se brenda NATO-s po shqyrtohet nëse është e nevojshme të zhvillohet një tjetër takim i nivelit të lartë gjatë vitit 2027.
Në rast se zhvillimet ndërkombëtare do të kërkonin një takim urgjent, një samit mund të zhvillohej në një format tjetër ose në selinë e NATO-s në Bruksel.
Deri tani nuk ka një njoftim zyrtar nga NATO që anulon mbajtjen e samitit në Shqipëri. Për këtë arsye, raportimet mbeten pjesë e diskutimeve diplomatike dhe çdo vendim përfundimtar pritet të bëhet publik nga vetë Aleanca.
Çështja pritet të tërheqë vëmendje të madhe edhe në Shqipëri, pasi zhvillimi i Samitit të NATO-s në Tiranë ishte prezantuar nga kryeministri Edi Rama si një moment me rëndësi historike për vendin.
